اليوم في الكوفي شوب, هديت الكتاب الي صار لي دهر بخلصه و مو قادرة اركز و قعدت اتمقل في الي حوالي
اغلب الموجودين مواعدين
عيني عينك و الحجة الدراسة و الامتحانات
سرحت في حياتنا قبل...شلون كانت البنت تستحي و المفروض انها ما تكلم شباب حتى في الجامعة
حسيت اني من عصر ثاني
الدنيا تغيرت و انا ليما الحين احس بغضب شديد يتعلق بالتخلف الي كان يعيش فيه جيلي
و شلون أثر على وايد بنات اعرفهم
الي تزوجت و ما توفقت
و الي تطلقت
و الي ما تبي تتزوج خير شر
و الي تبي تتزوج بس مو عارفه تشيل راسها من الارض بسبة التربية الصارمة و مو عارفة تحط عينها في عين واحد في مكان عام
ايي ..اكو جذيه بنات
لا يستغرب احد
خنقتني العبره و انا اطالع الي حولي
شلون مشى الزمن
شلون كبرنا
شلون بعض الوجوه تغيرت
و تم حال ناس وايد واقف..محلك سر
هالايام ما اعرف اعبر عن غضبي
صايره قنبلة موقوته متحركة على رجلين
اخاف احد يقول شي..اي شي
اخاف انفجر في العلن
العادة انفجر هني..في هالمدونة
بس يقولون راح عصر المدونات
طرا علي الحين اني من يوم وقفت الكتابة هني
و الغضب يتراكم
يجوز هذا هو السبب
و يمكن لأني مريت بتجربة انسانية محبطة لما وقفت
عرفتني بناس و عرت وجوهم بسرعة شديدة
و ايضا رجعتني لمعرفة ناس قدم
و اكشفت وجوهم القبيحة الي ما كنت شايفه جانبها القبيح بسبب سنوات القطيعة الطويلة
ودي..لو مرة وحدة في حياتي
يمر على رجل واحد اقدر اقول عنه ادمي و يخاف الله في الناس
خصوصا في البنات حواليه
سواء في العمل او في الحياة العامة
يخرب بيت الرياييل حتى الديّن فيهم طلع....سرسري
تحياتي
ولهت على جاكو..وينك يا جاكو
اختك طز تناديك
11 comments:
اللي يقول عصر المدون انتهي مخطيء
المدونه مالها وقت خصوصا لو كانت للفضفضه
بالنسبه لي مدونتي عمرها ماراح يخلص عصرها طالما لازال في بالي كلام ممكن ينقال وينكتب ويقرونه الناس ويستمتعون فيه معاي
سعيده بعودتك ياطز
صحيح اني قارئه صامته
ولكني متابعة متعصبه
والرياييل فيهم الزين يالشيخه
بس شحوا بهالزمن وصاروا جنهم ابره بكومة قش
اما الباجي فالله يعينهم على نفسهم
جيلنا بو الحيا ماله دوا
وجيلهم وايد العلافات فيه الإنسانية اسهل من غير عقد ولا تحفظات توقف حال البنت وتحط مشاعرها على الرف
كنت اتمنى اني انولد بوقت غير هالوقت
عمري ما حسيت بالإنتماء لجيلي
:)
والله حاسه فيج وباللي يمر عليج احس شعور بلغربه من الناس واللي قاعد يصير
وجيلنا احسه انظلم وماعاش حياته عدل كل اللي كنا نشوفه جريمه الحين اليهالو هابين فيه اشكرا واهلهم يطالعون لهم بنظره ام دلي بروايه هاري بوتر :;p
حسره علينا والله والحين مثل اللي مو عارف يكمل الطريج ولا يرد للبدايه
أنا متابعة لمدونتج بس هذي أول مشاركة لي
أنا خلاص عافك الخاطر
لا و أنا مو جيلج
أصغر بعد ههههههه
بصراحة, كله من أفلام ديزني
سالفة برنس شارمنغ و قصص الحب زادت من توقعاتنا
أنا كل ماأفكر ابها الموظوع أقول أنا صايرة مو واقعية و انا متروسة عيوب و خل اتغاظى عيوب غيري بس تعالي شوفي عيوب الرياييل و عيوب الحريم
مثل نمونتج ترا وايد
تدرين انا متى بديت أشوف الجانب السوداوي للحياة الوردية اللي كنت عايشتها
أو بالأحرى متلحفة فيها عالآآآخر
( لما بديت أشتغل )..
ناس غريبة ، وناس مريضة ، وناس قليلة أدب ، وناس أدبها ما تلحقين عليه
وبنات المستحى اللي قلتي عنهم كان آخرهم بنات أول الثمانينات برأيي..
والرياييل فيهم الشين وفيهم الزين
بس عيال هالوقت ماااكو
صدقتي
بس هم ترا البنات فيهم الزين والشين
:)
اى والله طز طز ومن قلب بعد بس تر في اوادم من الرياييل الي ينحطون على الجرح يبرى بس قليليين اقدر اعدهم على اصباعي
بخصوص كلامج عن البنات وان راح الحيى ما حبيته صراحه لان في شي من العنصريه
ليش ما تتكلمين عن الرياييل بعد الي فصخو الحيا ويواعدون
مستحيل يصير مجتمعنا خوش مجتمع اذا احد الجنسين مو راضي يتربى بحجه انه شايل عيبه
موفقه
يا صباح الخير
:)
الصراحة اخجلتم تواضعنا طال عمرج
احنا عزلنا من المدونة ، حاشنا التثمين ورحنا تويتر
حياج هناك الوضع أفضل
تركت من فترة ممكن شهر أو أكثر رسالة لج...لكن واضح أن ماوصلت
إذا عندج حساب في تويتر بلغيني ، وإذا ما عندج ضروري تشرفينا هناك
تحياتي
التراكم، أفهم هالكلمة عدل
المشكلة بالعلاقات بالكويت مو بس بين الرجل و المرأة هم بين الناس و أي شي حولهم
البيت، المحلات، الزرع
كل شي نشوفه بلاستيك و تركيب
بعيدين احنا عن كل شي، مع ان الكويت صغيرة
مادري
ولكم باك ولهنا علي بوستاتج :)
بس تشوفين ان الي قاعد يصير صح؟
شوفي نسب الطلاق وين وصلت
شوفي الخيانة الزوجية الي زادت للاسف من الرياييل والحريم
حريم متزوجات قامو يتفاخرون بهالشي الله لايبلانا
كله بسبة ضياع الحيا
لو خليت خربت
وان شاء الله تحصلين كل ما تتمنين
:)
عندي نفس الغضب على الظلم اللي عاشه جيلي استغربت فيه حد مثلي انتوا اهون عنا بوايد لو اخبرج قائمة الممنوعات اللي كانت علي جيلي بتضحكين اما انا عندي افكار عن الرياييل المواطنين الاماراتيين لو اكتبها يسكرون المدونه بكبرها
رغم اني الحمدالله محد من اهلي من هالنمونه بس اللي اشوفه واسمعه كرهني فيهم كلهم
ههههههههههههههه مجنونه انتي !!
قرأت مدونتك وانسجمت بشكل عجيب ومافيه الاقوة ضحك على تعليقاتك جلدتيهم جلد
بس اهنيك على قوتك واصرارهم على كثر خيباتي معاهم مازال عندي امل واني ممكن احصل روميو العرب
المهم ربي يسعدك ويرزقك الطيب الي يقدرك وبليز لايوقف نبي تدوينات جديده
Post a Comment